អាជ្ញាធរជាតិ ធំពីរ និងក្រសួងបរិស្ថាន បន្តរួមគ្នាផ្សព្វផ្សាយលើកកម្ពស់ការយល់ដឹងពីបញ្ហាជំងឺអេដស៍ មេរោគអេដស៍និងផលវិបាកនៃគ្រឿងញៀន ក្នុងវិស័យបរិស្ថាន
22-July-2019 | ដោយ ពលមនសិការ
ព្រះវិហារ៖ នៅថ្ងៃទី២២ ខែកក្កដា ឆ្នាំ២០១៩ ក្រោមកិច្ចសហការរវាងក្រសួងបរិស្ថាន អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងអាជ្ញាធរជាតិប្រយុទ្ធនឹងជំងឺអេដស៍ បន្តរៀបចំសិក្ខាសាលាផ្សព្វផ្សាយស្ដីពីការលើកកម្ពស់ការយល់ដឹងអំពីជំងឺអេដស៍ មេរោគអេដស៍ និងឥទ្ធិពលគ្រឿងញៀន នៅមន្ទីរបរិស្ថានក្រោមអធិបតីភាពឯកឧត្តម សាបូ អូហ្សាណូ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តមវេជ្ជបណ្ឌិត ស៊ឹម គឹមសាន ទីប្រឹក្សាអាជ្ញាធរជាតិប្រយុទ្ធនិងជំងឺអេដស៍ ឯកឧត្តម លី សារ៉ារិទ្ធ អភិបាលរងនៃគណៈអភិបាលខេត្តព្រះវិហារ ព្រមទាំងមានការចូលរួមពីថ្នាក់ដឹកនាំ តំណាងគណកម្មាធិការត្រួតពិនិត្យគ្រឿងញៀនខេត្តព្រះវិហារ មន្ត្រីរាជការ តំណាងមកពីមន្ទីរបរិស្ថាន ឧទ្យានុរក្ស សរុបចំនួន៦០នាក់។
ឯកឧត្តម លី សារ៉ារិទ្ធ អភិបាលរងខេត្ត បានមានប្រសាសន៍ស្វាគមន៍ដោយបានលើកឡើងពីការរីកចម្រើនរបស់ខេត្ត និងថ្លែងអំណរគុណដល់ថ្នាក់ជាតិបានបង្កើតកម្មវិធីផ្សព្វផ្សាយបង្ការបញ្ហាគ្រឿងញៀន-អេដស៍នេះឡើង។
ក្នុងឱកាសនោះ ថ្លែងក្នុងនាម ឯកឧត្តម សាយ សំអាល់ ឯកឧត្តម សាបូ អូហ្សាណូ រដ្ឋលេខាធិការ បានមានប្រសាសន៍ដោយសម្ដែងនូវការកោតសរសើរចំពោះ អគ្គលេខាធិការដ្ឋាន អាជ្ញាធរជាតិ ប្រយុទ្ធប្រឆាំង គ្រឿងញៀន និងអាជ្ញាធរជាតិប្រយុទ្ធនឹងជំងឺអេដស៍ផ្តល់កិច្ចសហការចូលរួមយ៉ាងសកម្មប្រកបដោយឆន្ទៈមុះមុតក្នុងការដឹកនាំផ្សព្វផ្សាយក្នុងការងារប្រយុទ្ធប្រឆាំងគ្រឿងញៀន ការងារប្រយុទ្ធនឹងមេរោគអេដស៍ ជំងឺអេដស៍និងការជួយគាំពារដល់ជនរងគ្រោះ និងជនងាយរងគ្រោះ។
ឯកឧត្តម វេជ្ជបណ្ឌិត ស៊ឹម គឹមសាន ទីប្រឹក្សា ក៏បានថ្លែងអំណរគុណដល់ថ្នាក់ដឹកនាំក្រសួងនិងសូមឲ្យអ្នកចូលរួមជួយបង្ការ ទប់ស្កាត់និងផ្សព្វផ្សាយបន្តដើម្បីកុំឲ្យមានការរីករាលដាលបញ្ហាមេរោគអេដស៍ រលកទី២ ហើយខេត្តព្រះវិហារមានអ្នកផ្ទុកមេរោគអេដស៍បានទៅទទួលយកសេវាព្យាបាលមាន៣១០នាក់។
ឧត្ដមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា ក៏បានថ្លែងអំណរគុណដល់ក្រសួងបរិស្ថានដែលបានយកចិត្តទុកដាក់អនុវត្តន៍ផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលលើកទី១ ដល់ទី៣ ហើយបាននឹងកំពុងបន្តអនុវត្តផែនយុទ្ធនាការលើកទី៤ សំដៅការបង្ការទប់ស្កាត់ ការរីករាលដាលនូវបញ្ហាគ្រឿងញៀនក្នុងវិស័យបរិស្ថាន។
ក្នុងអង្គសិក្ខាសាលានេះផងដែរ បានផ្ដល់នូវចំនេះដឹងអំពីផល់ប៉ះពាល់ និងគ្រោះថ្នាក់បណ្ដាលមកពីការប្រើប្រាស់គ្រឿងញៀន និងការរីករាលដាលនៃការឆ្លងមេរោគអេដស៍ និងជំងឺអេដស៍នៅប្រទេសកម្ពុជាដល់សិក្ខាកាមដែលបានចូលរួមទាំងអស់ដើម្បីបង្កើនចំណេះដឹង និងជួយផ្សព្វផ្សាយបន្តទៅដល់សហគមន៍របស់ពួកគាត់អោយមានការយល់ដឹងព្រោះគ្រឿងញៀន និងជំងឺអេដស៍ ជាបញ្ហារួមរបស់យើងទាំងអស់គ្នា ៕
ចំនួនអ្នកទស្សនា
- ថ្ងៃនេះ9001
- ម្សិលមិញ14181
- សប្តាហ៍នេះ9001
- ខែនេះ124151
- ឆ្នាំនេះ124151
- សរុប20566607